නිල්වලා ලවණ බාධකයෙන් වගා පාඩුවූ ගොවීන්ට වන්දි 

නිල්වලා ගඟ ආශ්‍රිතව අවිධිමත්ව ඉදිවූ ලවණ බාධකය හේතුවෙන් ඇතිවූ ගං වතුර තත්ත්වය හමුවේ වගා කිරීමට නොහැකි වූ ගොවීන් වෙනුවෙන් වන්දි ලබාදීම අද (22) සිදුකෙරුණි.

එහිදී තිහගොඩ ගොවිජන සේවා බල ප්‍රදේශයට අයත් පීඩාවට පත් ප්‍රතිලාභී ගොවීන් 781 දෙනෙකුට චෙක්පත් බෙදාදීම මිදෙල්ලවල පුරාණ මහ විහාරයේදී සිදු කර තිබේ.

මෙම ගොවි ජනතාව වෙනුවෙන් 2026 වසරේ අයවැය මඟින් වෙන් කරන ලද රුපියල් මිලියන 1200කි.

අදාළ ලවණ බාධකය හේතුවෙන් 2019 වසරේ යල කන්නයේ සිට 2022 වසරේ යල කන්නය දක්වා කන්න 7ක් පුරා මෙම ගොවීන්ට සිය වගා කටයුතු කරගැනීමට නොහැකි විය. 

මෙම අවස්ථාවට එක්වෙමින් පාර්ලිමේන්තු මන්ත්‍රී මහාචාර්ය එල්. එම්. අබේවික්‍රම මහතා ප්‍රකාශ කළේ, ලවණ බාධකයේ දෝෂ නිවැරදි කිරීම සඳහා රුපියල් මිලියන 1000ක ප්‍රතිපාදන වෙන් කර ඇති බවය.

ඉදිරි අවුරුදු 50ක් තුළ නැවත මෙවැනි ගැටලුවක් මතුවීමට ඉඩ නොදී අනාගත පරම්පරාව නිල්වලා ගඟේ ජලයෙන් යට නොවෙන්න විද්‍යාත්මක අධ්‍යයනයක් කළ යුතුය.

ඒ හේතුවෙන් හයිඩ්‍රෝලික් විශේෂඥ ඇතුළු දේශීය හා අමෙරිකානු ඉංජිනේරුවන්ගෙන් සමන්විත ලංකාවේ ප්‍රධානම ආයතනයක් වන ශ්‍රී ලංකා ඉංජිනේරු ආයතනයට අධ්‍යයන කටයුතු භාරදී ඇති බව මන්ත්‍රීවරයා කියාසිටියේය. 

ඉදිරි වර්ෂාපතන තත්ත්වයන් සහ ගඟේ ජල ගැලීම් ගණනය කරමින් ඔවුන්ගේ අවසන් නිර්දේශ ඉදිරි කාලයේදී ලැබුණු සැනින් ස්ථිර පිළියම් යොදවන බව ද මහාචාර්ය එල්. එම්. අබේවික්‍රම මහතා වැඩිදුරටත් ප්‍රකාශ කළේය.